БИШКЕК, 2-ноя. — Sputnik. Референдум жөнүндөгү мыйзамга Атамбаевдин кол коюшун күтүп, талкууларга атайын келбей жүрдүм. Бул тууралуу "Ата Мекен" фракциясынын лидери Өмүрбек Текебаев парламентте сүйлөп жатып билдирди.
Анын айтымында, референдум жөнүндө мыйзам күчүнө кирип, ага ылайык элдик добуш берүүнү дайындоо тууралуу мыйзам долбоорун кабыл алууга тиешелүү убакыт керек.
"Референдум жөнүндө мыйзам кабыл алынып, "Эркин-Тоо" гезитине жарыяланды. Мен атайын ушул мыйзамдын кабыл алынышын күтүп, талкууларга келбей жүрдүм. Референдум жөнүндө мыйзам кабыл алынган соң, туура бир айдан кийин гана элдик добуш берүүнү дайындоо боюнча мыйзамды карашыбыз керек. Биз бир ай өтпөй эки окуудан өткөрүп жибердик", — деди Текебаев.
"Ата Мекендин" лидери танапис алуу менен талкууну токтотуп, юристтерден консультация алууну сунуштады.
Ал эми төрага Чыныбай Турсунбеков талкуудан кийин маселе тактала турганын айтып, мыйзам долбоорун кароо улантыларын билдирди.
