Жогорку Кеңеште төраганы шайлоо боюнча добуш берүү башталды

Жазылуу
Бул депутаттардын төраганы шайлоого болгон экинчи аракети. Алгачкысында эки талапкер тең бирдей добуш алып, Жогорку Кеңеш башка талапкерлерди алып чыгуу менен кайрадан шайлоо өткөрүү чечимине келген.

БИШКЕК, 27-апр. — Sputnik. Жогорку Кеңеште төраганы шайлоо боюнча добуш берүү башталды.

Турсунбеков менен Масалиев: төрагалыкка талапкерлер тууралуу фактылар
Алгачкы болуп бюллетенди депутат Мыктыбек Абдылдаев таштады. 

Спикерликке "КСДП" фракциясы Чыныбай Турсунбековду алып чыгып, "РАЖ", "Ата-Мекен" фракциялары колдогон. Ал эми "Өнүгүү-Прогресс" фракциясы Исхак Масалиевдин талапкерлигин көрсөттү. 

Буга чейин талапкерлер депутаттарды өз программалары менен тааныштырып, алардын суроолоруна жооп беришти. 

"Конституцияны өзгөртүү — бул олуттуу маселе. Андыктан азыр бир тараптуу пикир айта албайм. Эгерде мен спикер болуп шайланып калсам чын жүрөгүмдөн Кыргызстанга кызмат кылууга даярмын", — деди Турсунбеков.

Ал ортодо Исхак Масалиев убакыттын тардыгынан улам программасын толук кандуу иштеп чыгууга жетишпей калганын билдирди. 

"Кудай буйруп мен спикер болуп калсам ак дилден кызмат кылам. Араңыздарда бир гана коммунист бар экен. Алты партия өкүлдөрү ал коммунистти шайлап койсоңор жаман болбойт деп ойлойм", — деди Масалиев.

Талапкер спикерлик кызмат тийип калса депутаттар анын кеңсесине "эшикти тээп" кире берсе болорун кошумчалады. 

Эскерте кетсек, депутаттар буга чейин да төраганы шайлоого аракет кылышкан. Спикерликке талапкерлигин койгон Канат Исаев менен Бакыт Төрөбаев шайлоодо 51ден добуш алып, жарыштан четтеп калган.

Жаңылыктар түрмөгү
0