БИШКЕК, 11-дек. — Sputnik. 2018-жылды Чыңгыз Айтматов жылы деп жарыялоо сунушу президент менен өкмөткө жөнөтүлөт. Бул туурасында Улуттук илимдер академиясынын президенти, академик Абдыганы Эркебаев "Айтматов окуулары – 2015" эл аралык илимий-практикалык конференцияны ачып жатып билдирди.
Эркебаев улуу жазуучунун 90 жылдык мааракесин татыктуу белгилөө керектигин айтат.
"Чыңгыз Айтматовдун 90 жылдыгын мыкты өткөрүү үчүн президентке, өкмөткө 2018-жылды "Чыңгыз Айтматов жылы" деп жарыялоо боюнча кабыл алынчу резолюцияны сунуштайм. Мындай ишти эрте жана мыкты даярданып өткөрүү керек. Чыңгыз агабыздын чыккан да, жарыяланбаган чыгармаларын бириктирип чыгаруу каралышы керек", — деди Эркебаев.
Конференцияда Казакстан, Өзбекстан, Кытай, Россия, Түркия сыяктуу башка мамлекеттерден окумуштуулар келишкен.
12-декабрда конференциянын катышуучулары Чыӊгыз Айтматовдун жаркын элесин эскерүү үчүн "Ата-Бейит" мемориалдык комплексине, ошондой эле жазуучунун үй-музейине барышат. XX кылымдын улуу жазуучусунун чыгармачылыгына арналган эл аралык илимий-практикалык конференциянын аягында резолюция кабыл алынат.
