Апта ирмеми: боорсокко суктанган Меркелден Түркиядагы аскердик коогалаңга чейин

Германиянын канцлери Ангела Меркель КР президенти Алмазбек Атамбаевдин чакыруусу менен Кыргызстанга алгачкы жолу расмий иш сапары менен 13-14-июлда келди

Индонезиянын Бромо жанар тоосунун кырындагы кишилер

Франциянын Ницца шаарында жүк ташуучу унаа Бастилияны алган күндү майрамдап жаткан кишилерди тебеледи. Муну өлкө президенти Франсуа Оланд теракт деп атады. Бул каргашанын кесепетинен 84 киши каза болсо, алардын ондон ашыгы балдар болуп чыкты

Кытайдын Хубэй провинциясындагы Лянцзы менен Нюшань көлдөрүнүн ортосундагы узундугу 3,7 чакырым болгон дамба жардырылды. Бийлик мындай жол менен Лянцзы көлүндөгү суунун көлөмүн азайтууну чечишкен. Аталган көлмөнүн деңгээли нөшөрлөгөн жаандан улам көтөрүлүп кеткен

Монголиянын борбору Улан-Батор шаарында "Азия — Европа" АСЕМ саммитинин форуму өттү. Сүрөттө Монголиянын президенти Цахиагийн Элбэгдорж Япониянын премьер-министри Синдзо Абэнин жаа атканын "Наадам" улуттук фестивалы учурунда карап жатат

АКШнын Даллас шаарындагы атышуудан каза болгондордун аза күтүү зыйнаты учурунда АКШнын мурдагы президенти Жорж Буш термеле бийлеп алды. Анын бул аракети коомдо түрдүү кабыл алынды

Улуу Британиянын өкмөтүн 2010-жылдан бери башкарып келе жаткан премьер-министр Дэвид Кэмерон 13-июлда отставкага кете турганын айтты. Анын ордуна өлкөнүн мурдагы ИИМ башчысы Тереза Мэй келди

Италиянын түштүгүндөгү Апулия облусунда катуу ылдамдыкта келе жаткан жүргүнчү ташыган эки поезд кагылышты. Анын кесепетинен 20 киши каза болуп, 50гө жакыны жаракат алды

2016-жылдын 16-июлунун түнүндө Түркиядагы аскерлер өлкөдө төңкөрүш кылууга аракет кылды. Бирок, алардын бул ою ишке ашпай калганын өлкөнүн бийлиги билдирди. Мындай аракеттердин кесепетинен акыркы маалыматтар боюнча 265 киши каза болуп, жүздөгөн адам жаракат алды

Түркиянын президенти Тайип Эрдоган мамлекеттик төңкөрүш жасоо аракети учурунда каза болгон 7 кишини жерге берүү зыйнатына катышты. Ал Стамбул шаарындагы "Фатих" мечитинде өттү

Күн батареялары менен иштеген Solar Impulse 2 учагы жер шарын айланды. 2015-жылдын март айында башталган саякат учурунда учак Оман, Индия, Мьянма, Кытай, Япония жана АКШнын бир катар шаарларында болгон. Сүрөттө Solar Impulse 2 Каирдеги Гиза пирамидасынын үстүнөн учуп баратат

Евро-2016 чемпионатынын жеңүүчүсү болгон Португалиянын курама командасын Лиссабондун аэропортунан тосуп алуу учуру

Рио-де-Жанейро шаарынын сүрөтчүлөрү чоң граффити жасашты. Ал жайкы олимпиада оюндарына арналган. Сүрөттүн аянты 3000 чарчы метр

Майами шаарында өткөн мода жумалыгында бикинилер да көрүүчүлөрдүн назарына тартууланды

Москвадагы Останкино телемунарасынын айланасындагы чагылган. Россиянын борборунда мөндүр аралыш катуу жамгыр жаады. Аны 1998-жылдан берки эң ири жамгыр деп аташты