БИШКЕК, 24-май — Sputnik. Чүй облусунун Москва районунда мал уурулук менен алектенип келгендер кармалды. Бул тууралуу Ички иштер министрлиги билдирди.
Маалыматка ылайык, үстүбүздөгү жылдын 14-май күнү белгисиз жаран Ак-Суу кыштагында торпокту байланып турган жеринен уурдап кеткен. Аталган факт боюнча Чүй облусунун 26 жаштагы жараны кармалды.
Мындан сырткары, Ош облусунун Кара-Суу районунда үстүбүздөгү жылдын 23-май күнү уй жоголгон. Ыкчам тергөө амалдарынын жүрүшүндө аталган кылмыш боюнча 18 жана 45 жаштагы айыл тургундары кармалган.
Мал уурдоо фактысы боюнча кылмыш иши козголуп, тергөө амалдары башталды.
