Инспекторлорго кол көтөрүп, погонун жулуп алган дагы бир айдоочу камакка алынды

© Sputnik / Табылды КадырбековЖол кайгуул кызматкери. Архив
Жол кайгуул кызматкери. Архив - Sputnik Кыргызстан
Жазылуу
Кыргызстанда Жол кайгуул кызматынын инспекторлорун тоготпой, ал тургай денесине залал келтирген фактылар акыркы учурда көбүрөөк кездешүүдө.

БИШКЕК, 26-фев. — Sputnik. Катуу ылдамдык менен Бишкек — Ош багытында бара жаткан айдоочу Жол кайгуул кызматынын инспекторлорунун эки жерден токтоткондугун тоготпой өтүп, артынан келип кармоого аракет кылган тартип сакчыларына кол көтөргөн. Бул туурасында Жалал-Абад облустук сотунун маалымат кызматы кабарлады. 

Соттун маалыматында Жалал-Абад ОИИБдин Жол кайгуул кызматынын инспекторлору Улан Карабаевди Токтогул шаарчасынан саатына 128 чакырым ылдамдык менен бара жаткан жеринен, андан кийин кийин Үч-Терек айылынан токтотууга аракет кылышкан.

"Жол кайгуул кызматынын эки инспектору автоунаанын артынан кууп барып токтоткондо Карабаев милициянын ага лейтенантын эч себепсиз бетке уруп, формасынын бир жак погонун жулуп алган. Ага жардамга келген милициянын ага лейтенантын да бетке уруп, формасынын погонун жулган", — деп айтылат облустук соттун тараткан маалыматында.

Баш бербеген жолоочу учурда Таш-Көмүр шаардык сотунун чечими менен эки айга камакка алынып, Кылмыш жаза кодексинин 341-беренесинин (Бийлик өкүлүнө карата зомбулук көрсөтүү) негизинде кылмыш иши козголгон. 

Айдоочу: Инспектор капотко секирип, тапанчасын такагандыктан, коркуп айдап жибердим
Карабаевдин жактоочусу жеке даттануу менен кайрылып, Таш-Көмүр шаардык сотунун токтомунун эки айга камакка алуу жөнүндөгү бөлүгүн алып салуу менен бөгөт коюу чарасын өзгөртүп үй камагын тандоону сураган. Бирок, Жалал-Абад облустук сот шаардык соттун чечимин күчүндө калтырылган.

Кыргызстанда Жол кайгуул кызматынын инспекторлорун тоготпой, ал тургай денесине залал келтирген фактылар акыркы учурда көп кездешүүдө. Акыркы ирет мындай жагдай Бишкек шаарында катталып, инспекторду айдоочу капотко жыгылган абалында бир нече метрге чейин айдап кеткен.

Жаңылыктар түрмөгү
0