БИШКЕК, 14-сен. — Sputnik. Ош шаарына караштуу Алмалык айылында 13-сентябрь күнү болжол менен кечки саат тогузда тоонун ылдый тарабы сүрүлүп, сел кетүүчү каналга жер көчкөнүн ӨКМ билдирди.
Маалыматка ылайык, анын кесепетинен Алмалык айылындагы 16 үй-бүлөнүн турак жайлары кооптуу абалда калган.
Окуя болгон жерге барган куткаруучулар ири көлөмдөгү жер майдаланып көчүп, сел жүрүүчү жылганын ичине түшкөнүн жана турак-жайларга кооптуу абал түзүлгөнүн көрүшкөн. Кырсыктын алдын алуу максатында 16 үйдүн жашоочулары мал-жандыктары менен коопсуз жайга көчүрүлдү.
Түн болгондуктан, куткаруучулар иш-чараларды убактылуу токтотушкан. Министрлик аталган кырдаал боюнча кошумча маалымат берилерин белгилейт.
