БИШКЕК, 20-дек. —Sputnik. Кыргызстан чет элдик жана дүйнөлүк уюмдардан жеңилдетилген насыя алуусун улантып жатканын Финансы министри Адылбек Касымалиев Sputnik Кыргызстан агенттигинин мультимедиалык борборунда берген маалымат жыйынында айтты.
Анын айтымында, Кыргызстандын өзүн каржылоого мүмкүнчүлүгү бар, бирок өсүп-нүгүүгө каражаты жетишсиз.
"Бизде бюджет тартыштыгы бар. Бирок аны жабуучу каржы булактары дагы жок эмес. Каражат негизинен Кыргызстанда чоң-чоң инфраструктураларды курууга кетет. Мисалы, Бүткүл дүйнөлүк банктан насыя алабыз. Ал каражат киреше болуп эсептелбейт, баланстан тышкары турат. Биз ошол акчаларга жол курабыз. Ал эми жол курууга кеткен акча чыгаша болуп эсептелет. Биз ошонун эсебинен бюджет тартыштыгын жаап жатабыз. Мындай жеңилдетилген насыяларды коңшу өлкөлөр ала албашы мүмкүн", — деди министр.
Маалыматка караганда Кыргызстан алып жаткан насыялардын көпчүлүгү 30-32 жылга 0,75 пайыздык үстөк менен берилүүдө.