БИШКЕК, 1-июл. — Sputnik. Ош шаардык ички иштер башкармалыгынын ИИМдин жер тилкесине көп кабаттуу үй куруу боюнча жарыяланган тендери токтотулган эмес деген маалыматын Финансы министрлиги жокко чыгарды.
Министрлик мындай билдирүүнү Sputnik Кыргызстан агенттигинин буга чейин "Тендер чуусу: миллиондорду чапчыган тамгалар, же "латындашуудан" кантип арылуу керек" деген аталыштагы материалдагы маалыматты жүйө катары келтирген.
Анда ИИМдин Ош шаардык жана облустук башкы башкармалыгынын маалымат кызматынын жетекчиси Жеңиш Ашырбаев жарыяланган тендер токтотулбаганын айткан.
"Бирок Финансы министрлиги Ош шаардык ички иштер башкармалыгынан 30.05.2016-жылы 16053014437227 номур менен жарыяланган конкурстун токтотулганы туурасында кат алгандыгын расмий түрдө билдирет",— деп кабарланган сайтында.
Ал эми ИИМдин маалымат кызматынан коомчулукта көп талкуу жараткандыктан, аталган тендер жокко чыгарылгандыгын маалымдашты.
Мамлекеттик сатып алуулар порталында жарыяланган бир катар тендерлер туура эмес, тагыраагы кириллица эмес, кайсы бир тараптардын кызыкчылыгы үчүн латын тамгалары менен киргизилген деген маалыматтар чыккан. Алардын бири Ош шаардык ички иштер башкармалыгынын 431 миллион сомдук үйдү куруу боюнча жарыяланган тендери деп айтылган.
