БИШКЕК, 9-янв — Sputnik. Айыл-чарба министрлиги 2012-2014-жылдардагы чөптүн баасы боюнча статистикалык маалыматты жарыялады. Ага ылайык, аталган жылдары чөптүн баасы 2 эсеге кымбаттаган.
2014-жылдын декабрь айынын аягына алынган маалымат боюнча бир түк чөптүн баасы: Нарын облусунда – 160-350 сом, Талас облусунда – 250-300 сом, Чүй, Ысык-Көлдө – 180-280 сом, Баткенде – 270 сом, Жалал-Абадда – 170-250 жана Ош облусунда 145-180 сомду түзгөн.
Нарын облусунун Ат-Башы районунун тургуну Тилек Үсөналиевдин айтымында, учурда райондо бир боо чөп 300-320 сомдон сатылып жатат.
"Бул жылы 2013-жылга салыштырганда чөп арзан. Мурдагы жылы кургакчылык болуп, район боюнча чөп начар чыккан. Кышында бир боо чөптүн баасы 450-500 сомго чейин көтөрүлгөн. Быйыл чөптүн баасы сапатына жараша 320 сомго чейин сатылып жатат", — дейт Үсөналиев.
Мал багууга ылайыкташкан Суусамыр өрөөнүндө чөп былтыркыга салыштырмалуу 100 сомго чейин кымбаттаган. Суусамыр айыл өкмөтүнүн башчысы Айбек Мырзакматовдун Sputnik сайтына маалымдашынча, учурда бир түк саман 100 сомдон сатылууда.
"Азыр Суусамыр өрөөнүнөн сыртка сатылып жаткан бир түк чөптүн баасы 200 сомдун айланасында. Ал эми бир түк саман 100 сомдон сатылып жатат. Былтыр бир түк чөп 100 сомдон сатылса, бир түк саман 50 сомдон сатылган", — деди Мырзакматов.
Суусамыр айыл өкмөтүнүн башчысы өрөөндөгү чөптүн баасы Чүйдөгү базарлардагы баадан көз каранды экенин кошумчалады.
Мал-жандуу келген алыскы Чоң-Алай районунун жашоочусу Тилек Тилебалдиев аталган аймакта бир машина эндей чөп 15-20 миң сомдон сатылып жатканын билдирди.
Айыл-чарба министрлигинин 2012-2014-жылдардагы маалыматы боюнча чөптүн баасы аймактар боюнча төмөндөгүдөй болгон:
