БИШКЕК, 2-ноя. — Sputnik. Президент Алмазбек Атамбаев маданият кызматкерлерин кесиптик майрамы менен куттуктап, соңку мезгилдери өткөрүлгөн ири маданий иш-чаралар Кыргызстандын жаңы тарыхындагы эң көрүнүктүү окуя катары калганын айткан. Бул тууралуу мамлекет башчынын маалымат кызматынан кабарлашты.
Президент куттуктоосунда Тарых жана маданият жылында ата-бабалар мурасынын жанданып жана дүркүрөп өсүшү байкалганын белгилеген.
"Үркүндүн 100 жылдыгы, даанышман бабабыз Баласагындын 1000 жылдыгы, ата-бабалар жерин сактап келген Тайлак Баатырдын 220 жылдык мааракеси жана, албетте, Дүйнөлүк көчмөндөрдүн II оюндары Кыргызстандын жаңы тарыхындагы эң көрүнүктүү окуя катары калды", — деп айтылат куттуктоодо.
"Глобалдашуу процессинде кыргыз эли кайталангыс маданияты, салттары, элибиздин эркин мүнөзүнө төп келген жарашыктуу кийим-кечеги менен айырмаланып, атаандаштыкка жөндөмдүү экенин далилдеди", — деген Атамбаев.
Мындай иштердин бардыгы маданият кызматкерлери тарабынан ишке ашып жатканын белгилеген мамлекет башчы маданият адамдарына ыраазычылык билдирди.
"Далай оор сыноолорду жеӊип отуруп, ата-бабалар мурасын сактап, кийинки муунга жеткирип жатканыӊыздардын өзү алкоого арзыйт. Кымбаттуу маданият кызматкерлери, майрамыңыздар кут болсун", — деп куттуктаган президент.
Ал маданияттын бардык кызматкерлерине чың ден соолук, бакыт-таалай жана чыгармачылык ийгиликтерди каалаган.
