БИШКЕК, 27-сен. — Sputnik. Түркиянын Стамбул шаарында өтүүчү даректүү тасмалардын эл аралык фестивалына Артыкбай Сүйүндүков менен Молдосеит Мамбетакунов тарткан "Көч" тасмасы катышмай болду. Бул тууралуу Кинематографты колдоо фондусу билдирди.
Эскерте кетсек, буга чейин аталган сынакка Адилет Каржоевдин "Сары-Ой" тасмасы барары белгилүү болгон.
Тасма көчкү алдында калуу коркунучуна карабай баккан малын коопсуз жайга көчүрүүгө белсенген топозчулардын жашоосунун бир ирмемин чагылдырат.
"Көч" буга чейин Катарда, Казанда өткөн фестивалдардын баш байгесине татыса, 2012-жылы улуттук "Ак Илбирс" сынагында "Мыкты даректүү тасма" номинациясын жеңип алган.
Фестивалды Журналисттердин дүйнөлүк ассоциациясы демилгелеген.
