БИШКЕК, 5-авг. — Sputnik. Россиялык "Дип коммьюникейшн" компаниясы "Айтыш фильм" киностудиясы менен биргеликте "Сулайман-Тоо" көркөм тасмасын тартууга киришкенин аталган киностудия билдирди.
Тасманын сценарийине ылайык, 45 жаштагы Карабас келинчеги Жыпар менен чогуу жашаганына карабай Турганбүбү аттуу жаш кыз менен жолугуп жүрөт. Жубайлардын Улук аттуу баласы 4 жашында балдар үйүнөн жоголуп кетет. Турганбүбүнүн боюнда болуп калганын уккан Жыпар үй-бүлөнү сактап калуу үчүн баланы асырап алууга барат.
Тасмага Елизавета Стишова режиссерлук кылса, сценарийин Алена Хмельницкая жазган.
Ал эми продюсерликти "9-рота" киносунун режиссеру Елена Яцура менен эл өкүлү Садык Шер-Нияз аркалоодо.
