БИШКЕК, 22-янв. — Sputnik. Россиялык режиссерлор Мария жана Денис Гуськовдун Кыргызстанда тартылган "Эркиндин кайтып келиши" аттуу тасмасы жакын арада Бишкектин тургундарына тартуулана турганын Кинематографты колдоо фонду билдирди.
Маалыматка ылайык, тасма үстүбүздөгү жылдын март айында өтө турган IV "Үмүт" кинофорумунун алкагында көрсөтүлөт. Бул үчүн атайы авторлордун уруксаты алынган.
Кыргыз жеринде тартылган тасма Канн фестивалынын алкагында өткөн студенттер тасмасынын "Синефондасьон" сынагында байгелүү орунга ээ болгон.
28 мүнөткө созулган кыска метраждуу тасма түрмөдөн чыгып келген адамдын коомчулукка ыңгайлашуу процессин чагылдырат.
