БИШКЕК, 12-дек. — Sputnik. "Манас" басып өткөн тарыхыбыздын энциклопедиясы болсо, Чыңгыз Айтматов элибиздин ХХ кылымдагы маданий гүлдөп өсүшүнүн туу чокусу экенин президент Алмазбек Атамбаев Улуттук адабият күнүнө карата куттуктоосунда билдирди.
Анын айтымында, кыргыз эли руханий байлыгы, адабияты менен дүйнө элинин алдында сыймыктанса болот.
"Улуттук адабият мамлекетибиз менен кошо телчигип, өнүгүп-өстү. Элибиздин басып өткөн тарыхын, үмүтүн жана тилегин чагылдырып, билим таратты, тарбия-таалим берди. Дүйнө таанымын кеңейтип, дүйнө элдеринин маданияты, улуу акылмандар жана жазуучулар менен тааныштырды. Элибиздин ички дүйнөсүн байытып, жалпы улуттук маданияттын, искусствонун өнүгүшүнө бел болду", — деп айтылат куттуктоодо.
Президент улуттук адабияттын калыптанып өнүгүшүнө жүздөгөн калемгерлер салым кошконун белгилеп, залкар акын-жазуучулардын чыгармалары аркылуу улуттук адабият бийик баскычка көтөрүлүп, классикалык деңгээлге жеткенин кошумчалады.
Өлкө башчы акыркы жылдары республикада туруктуулук орноп, мамлекет тынч эмгекке, руханий дөөлөттөрүн терең изилдеп, өнүктүрүүгө өзгөчө көңүл бөлө баштаганын билдирди.
"Дүйнө оомал-төкмөл болуп, айрыкча интернет күч алган мезгилде улуттук адабият алдында көп милдеттер турат. Жазуучуларыбыз жалпы журтка чындыкты жеткирип, элдин үмүтүн, тилегин терең чагылдырып, жакшылыкка, жаратмандыкка жана өнүгүүгө шыктандырып турууга тийиш. Биз жаңы таланттарды, элибиздин демине дем кошуп, сыймыгыбызды арттырган жаңы чыгармаларды күтөбүз", — деди мамлекет жетекчиси.
Кыргызстанда Улуттук адабият күнү 2011-жылдан тарта белгиленип келет. Бул күн улуу классик жазуучу Чыңгыз Айтматовдун туулган күнү болсо, залкар акын Алыкул Осмоновдун көз жумган күнү болуп саналат.
