БИШКЕК, 7-сен. — Sputnik. СССРдин Эл артисти Болот Миңжылкыев атындагы Опера искусствосунун экинчи эл аралык фестивалы үстүбүздөгү жылдын 4-11-октябрь күндөрү Абдылас Малдыбаев атындагы Кыргыз улуттук академиялык опера жана балет театрында өтө турганын Маданият, маалымат жана туризм министрлиги билдирет.
Маданий иш-чарага Россия, Түркия, Казакстан, Тажикстан жана Кыргызстандын опера искусствосунун чеберлери катышат. Фестивалды Моцарттын "Дон Жуан" чыгармасы менен кыргыз опера ырчылары ачат. Башкы партияларды Мусаев (Дон Жуан), Оксана Шутова (Донна Анна), Бактыгүл Бокоева (Донна Эльвира) аткарат.
Үч күн бою опера сүйүүчүлөр дүйнөлүк жылдыздардын чыгармачылыгына күбө болуп, 11-октябрь күнү бардык өнөрпоз меймандардын катышуусу менен ири гала-концерт өтөт.
Фестиваль учурунда дирижердук пультта Нурматбек Полотов, Кыргызстандын эмгек сиңирген артисти Рахатбек Осмоналиев жана Медет Осмонов иштейт.
