БИШКЕК, 26-июнь — Sputnik. Эл аралык "Мейкин Азия" фестивалына катышуу үчүн кыргызстандык аткаруучулар арасындагы тандоо туру 9-июлда Токтогул Сатылганов атындагы улуттук филармонияда өтө турганын Маданият министрлиги билдирди.
Фестивалдын жобосуна ылайык, Кыргызстандын атынан өнөрпоздор тандоо турунан өткөндөн кийин гана катыша алат.
Конкурстун шарты боюнча, 17 жаштан 35 жашка чейинки жаш аткаруучулар жана эл аралык конкурс, фестивалдардын лауреаттары катыша алат.
Тандоо турунда жана конкурста "+" фонограммаларын колдонууга тыюу салынат. Ал эми "-1" үлгүсүндөгү фонограммаларды колдонууга уруксат берилет. Аткаруучулардын ырлары 4 мүнөттөн ашпашы керек.
Буга чейин маалымдалгандай, кыргызстандык өнөрпоздорду тандоо туру 3-июлда өтмөк. Ал эми фестиваль 23-25-июлда Ысык-Көлдөгү "Рух-Ордо" маданий борборунда болот.
