Амансызбы, бурадар? Өлкөдө 10:15. Темир тулпарлардын таймашы жана күйүп кеткен унаа

Жазылуу
Кычыраган кыштын таңында баарыңыздарга ысык салам жолдоп, өткөн күнгө саресеп салабыз.

Кардын калың жаашынан улам өлкөдө бир топ кыйынчылыктар жаралып, айрым жолдор жабылууда. Ал эми карды көтөрө албай дарактардын сынуусу жаңылык деле болбой калды. Кечээ күнү үйүндө эс алып жаткан Расул байке көчөгө чыгам деп, аз жерден дарактын алдында кала жаздады. Бул окуя бир гана Расул байке менен эмес, башкалар менен да болушу толук мүмкүн. Андыктан абайлап жүрбөсөк болчудай эмес. 

Жолго чыгууда да абайлаңыз. Болбосо айрым көчөлөр кардан улам жабылууда. Мисалы, калың кардан улам Каракол — Эңилчек унаа жолу убактылуу тосулду.

Ал эми Бишкек мэриясы кечээ күнү жолго 495 тонна туз жана 37 тонна кум септи.

Ал ортодо аба ырайынын кескин өзгөрүүсүнөн улам "Манас" аэропорту убактылуу ишин токтотуп, түшкө чейин кете турган Ош, Москва, Стамбул, Дели, Душанбе, Үрүмчү каттамдары учпай калды

Андан соң учуп-конуу тилкеси тазаланып, аэропорт ишин улантты

Тилекке каршы, карга байланыштуу окуя ушу менен гана чектелбей, авто базардагы бастырма 12 унааны басып калды. Көп өтпөй базардын администрациясы унаа ээлерине компенсация төлөнө турганын билдирди.

Ал эми Бишкек шаарынын "Чыгыш-5" кичи районунда болсо жеңил унаа күйүп кеткендигин окурман кабарлады. Күйүп жаткан унаанын видеосун бул жактан көрө аласыз

Мындан сырткары кечээ күнү унаалардын беттеши өтүп, мыктылар тандалды.

Бүгүн Кыргызстандын көпчүлүк аймагын ала булут каптап, бирок жаан-чачын күтүлбөйт. Бишкек шаарында 8, ал эми Ошто 3 градус суук болот

Валюта наркы. Бүгүн сомдун баасы долларга карата орто эсеп менен 69.19 (сатып алуу) жана 69.30 (сатуу) сомду түздү. 

Мунай баасы. Бишкекте Аи-92 үлгүсүндөгү май 36.80 сом, Аи-95 үлгүсүндөгү бензин 39.00 сом, ал эми дизель майы 35,50 сомдон сатылууда. 

Соңку сөз ордуна. Сактансаң сактайм дейт. 

Эшикте суук болсо да, жан дүйнөңүз үшүбөсүн. Исмаил Мамытов. 

Жаңылыктар түрмөгү
0