Амансызбы, бурадар? Өлкөдө 10:15. Фарид Ниязовго дааган милиция, энесин сагынган кыз

Жазылуу
Жакшы жатып жай турдунузбу, мекендеш? Бүгүн күнгө бейшемби.

Бүгүн депутаттар киного барышат. Азыр оозго көп алынып, чет жактардагы кинофестивалдардан байге менен кайтып жаткан "Ата керээзи" бүгүн Жогорку Кеңештин депутаттарына көрсөтүлөт. Айтор, "Закрытый показ" дешти. Ал эми бизге, жөнөкөй жарандар үчүн тасма 28-октябрда "Октябрь" кинотеатрында көрсөтүлөт

Берилбей жаткан АКШ визасына чиновниктер чуркай турган шекилдүү. "Ата керээзи" демекчи, Sputnik Кыргызстан мультимедиалык борбордо кечээ өткөн маалымат жыйынында тасма продюсери "Оскар" сыйлыгына катышууда сүрөөнчүлүккө аттана тургандарга эмнегедир АКШ визасы берилбей жаткандыгын айткан. Кечээги маалымат жыйындан кийин өкмөттөгү аттуу-баштуу аткаминерлер телефон чалып, кыймылга келип, ал тургай виза маселесин чечүүгө аракеттер башталыптыр. Айтор, жаман эмес. 

Саясат, жаштар, кыйынмын дегендер. Депутаты, мамлекеттик кызматтагысы, айтор, баары бар. Жаштар ишеничти актайбы же жарга такайбы: азыркынын кыйын жаштары ким? Тизмени бир карап чыксаңыз ашыктык кылбайт. Ал тургай упай берсеңиз да болот.

Чо-ооң чиновникти Кайгуул милициясы кантип даап токтотту экен… Президенттик аппараттын жетекчиси Фарид Ниязовго жол эрежесин бузгандыгы үчүн 1000 сом айып салыныптыр

Кыздын себи. Турмушка узаган кыздарыбыздын себин кантип даярдаш керектиги туурасында анча биле бербегендер үчүн "базовый септин" инфографикасын сунуштайбыз. Кашыктан шырдакка чейин бар… 

Ааламга абай салсак, "оозду ачырган окуялар" бар экен. 

Кесирликтин чеги жок… Дубайда эки сандан турган унаа номери өткөн жумада тогуз миллион долларга (33 миллион дирхам) сатылган. 

Жүрөктү сыйырган өспүрүм. Ошто Россияда иштеп жүргөн энесин сагынып, сөйкөсүн 2 миң сомго сатып жөнөгөн окуучу кыз жолдон кармалып, айылдагы таенесине өткөрүп берилди. Жогорудагы тогуз миллионду алакандай темирге чачкан индус менен кызын таштап азыраак акча үчүн жанын сабап иштеп жүргөн эне, кусаланган өспүрүм… Жашоо ар кандай… 

Көр азабы. Эки метр жер буюрбаган эне үч жолу көмүлдү. Ала-Бука районундагы Сары-Таш айылында христианчылыктын баптист агымын карманган 76 жаштагы кемпир жашаган. Ызы-чуунун баары аны жерге берүүдөн кийин башталды… 

Валюта наркы. Бүгүн сомдун баасы долларга карата орто эсеп менен 68.07 (сатып алуу) жана 68.23 (сатуу) сомду түздү. 

Мунай баасы. Бишкекте орточо эсеп менен алганда Аи-92 үлгүсүндөгү май 36.50 сом, Аи-95 үлгүсүндөгү бензин 39.00 сом, ал эми дизель майы 33 сомдон сатылууда. 

Соңку сөз ордуна: Бирөө кечээрге кечүү таппай жүрсө, бирөө ичээрге суу таппай жүрөт 

Иш күнүңүздөр ийгиликтүү улансын! Урматым менен, Нургүл Максутова

Жаңылыктар түрмөгү
0