Калаа башчысы Албек Ибраимов шаардагы "Дыйкан" базары иштеп жатканын айтып, анын айланасында түзүлгөн кырдаал боюнча атайын маалымат жыйында түшүндүрмө берди.
Эске сала кетсек, шаардык мэрия түшкөн арыздардан улам "Дыйкан" базары жабылаарын билдирген.
"Жайында Ленин районунун акими менен бирге "Дыйкан" базарын атайын кыдырганбыз. Антисанитардык абалы боюнча бир топ арыздар түшкөн. Ал жактагы автотыгындардын бат-баттан катталышы, машиналар үчүн шарт жок экени айтылган. Ошого байланыштуу Экологиялык техникалык коопсуздук боюнча мамлекеттик инспекция жана Санэпидкөзөмөл барып бир катар эскертүүлөрдү берген", — деди ал.
Ага ылайык, базардын жетекчилиги айтылган мүчүлүштүктөрдү жоюшу керек болчу. Бирок айрым чоң нерселер жоюлбай калганын мэр баса белгиледи.
"Өрт коопсуздугу маселеси актуалдуу бойдон калууда. Себеби базардын жанында нефтебаза бар. Ал жакын арада чечиле койбойт. Азыр "Дыйкан" базар иштеп жатат, айтылган нерселерди жойгонго убакыт керек", — деди Ибраимов.
Учурда мэрия базарды ижарага алган жоопкерчилиги чектелген уюм менен иш алып барууда. Ошондой эле ал жерде соода кылган адамдарга эч кандай тоскоолдук жоктугун шаар мэри кошумчалады.
